ភ្នំពេញ៖ សម្តេចតេជោ ហ៊ុន សែន មានប្រសាសន៍ថា ធនធានមនុស្ស គឺជាចំណុចមួយដែលធ្វើឱ្យប្រទេសជាតិមានការអភិវឌ្ឍន៍ ព្រោះគ្មានធនធានមនុស្ស គឺមិនអាចធ្វើអ្វីបាននោះទេ។

សម្ដេចតេជោ ហ៊ុន សែន បានលើកឡើងបែបនេះក្នុងពិធីប្រគល់សញ្ញាបត្រជូននិស្សិតសកលវិទ្យាល័យឯកទេសនៃកម្ពុជា ប្រមាណជិត ៧ ០០០អង្គ/នាក់ នៅឯមជ្ឈមណ្ឌលពិព័រណ៌ និងសន្និសីទជ្រោយចង្វារ រាជធានីភ្នំពេញ នាព្រឹកថ្ងៃទី២៣ ខែមករា ឆ្នាំ២០២៣។

សម្តេចតេជោ ហ៊ុន សែន លើកទឹកចិត្ត និងជំរុញឱ្យខិតខំប្រឹងប្រែងរួមគ្នាដោះស្រាយបញ្ហាផ្សេងៗនៃការអភិវឌ្ឍន៍ធនធានមនុស្ស និងពង្រឹងសមត្ថភាពមនុស្ស ដើម្បីអាចឱ្យកម្ពុជា ដើរទាន់ឧស្សាហកម្មសេដ្ឋកិច្ចឌីជីថល ខណៈការបណ្តុះបណ្តាលធនធានមនុស្ស គឺដើម្បីបំពេញសេចក្តីត្រូវការលើការអភិវឌ្ឍន៍។

សម្តេចមានប្រសាសន៍ថា៖ «គ្មានធនធានមនុស្ស គឺមិនអាចធ្វើអ្វីបាននោះទេយើងត្រូវផ្តល់អាទិភាពទៅលើការបណ្តុះបណ្តាលធនថានមនុស្ស ដើម្បីឆ្លើយតបទៅនឹងសេចក្តីត្រូវការនៃការរីកចម្រើនរបស់ប្រទេសជាតិ»។

ជាមួយគ្នានេះដែរ សម្តេចតេជោ ហ៊ុន សែន ជំរុញឱ្យវិស័យឯកជនចូលរួមក្នុងសកម្មភាពវិនិយោគលើវិស័យអប់រំ ដែលជាផ្នែកមួយអាចជួយបានច្រើនក្នុងមួយឆ្នាំៗលើការបណ្តុះបណ្តាលធនធានមនុស្សនៅកម្ពុជា៕